La Lia culturala Fanes é na lia culturala che é gnuda metüda sö ai 10 de jené 2006 a La Ila sön iniziativa de Susy Rottonara, Roland Verra y Hans Peter Karbon do la produziun de so film, Le Rëgn de Fanes, le pröm film ladin dediché ala liënda de Fanes, a chël che al á tut pert jobleri y colauradus da deplü valades ladines y che á albü süa premiera ai 26 de novëmber 2005 a La Ila.

I mëmbri dla lia culturala Fanes vëgn da deplü valades ladines y dantadöt á contribuí personalmënter ala realisaziun dl film Le Rëgn de Fanes. Al é ince apascioná dla tradiziun dles liëndes ladines che ne á nia tut pert diretamënter al proiet filmich.

Obietifs:

La lia culturala Fanes se tol dant da valorisé la cultura ladina a pié ia dales liëndes ladines y dala storia dla Ladinia. Le fin de chësta lia é la promoziun dla cultura ladina tla Ladinia y foradecá tres formes artistiches desvalies -dantadöt la produziun cinematografica, leterara, musicala, tl’ert figurativa- y manifestaziuns culturales tres la colauraziun cun istituziuns sciöche universités, museums, biblioteches, festivals, convëgns, foliec culturai, contac cun d’ atres mendranzes y apascioná dles liëndes a livel nazional y internazional. Le blasun dla lia culturala Fanes é na stëra bröma sön funz d’ arjënt che aladô dla liënda é le simbôl dessigné sön i scüs di soldas de Dolasila por recordé la prinzëssa y süa Rajëta. Chësc motif dess rapresenté la orenté dla lia da se dé jö cun la sconanza dla tradiziun dles liëndes ladines.