LE FILM Y LA LIËNDA lí deplü…
L’obietif prinzipal de chësc proiet é sté chël da ti pité tla rapresentaziun filmica n meso nü y particolar de trasmisciun ala liënda de Fanes, che pó gní conscidrada un di plü gragn avëis culturai tla tradiziun a usc ladina. La liënda mostra sö deplü motifs dagnora atuai -classics-, a na moda che ara pois se conservé te na manira via y dantadöt che ara pois gní tuta sö cun mesi contemporans sides da pert dla jënt ladina sciöche ince da pert de n publich plü ampl. L’interpretaziun y la elaboraziun dl material dla liënda mostra sö la orenté da presenté tla manira miú chësta liënda culturalmënter tan rica tla realté d’aldedaincö, te na simbiosa cun les atmosferes desvalies pitades dai crëps che vëgn dant tla cuntia y insciö ince cun i elemënc y i corusc originai dla natöra. Ala basa dla elaboraziun filmica él la tradiziun baiota -ampezana dla liënda de Fanes.
Le film é gnü tut sö de messé 2005 te n valgügn danter i scenars plü bi de nösc crëps, da Fanes ala val de S.Nicoló te Fascia al lech de Braies.
Adinfora di promoturs ál tut pert ala realisaziun de chësc proiet cultural sö por cënt orentars -danter jobleri protagonisć, comparides, colauradus -dales valades Badia, Gherdëina y Fascia, che baia tl film so idiom ladin de valada, a na moda che al resultëia n plurilinguism ladin. Na particolarité dl film é insciö la corespondënza tla maiú pert di caji danter l’ idiom ladin baié dales figüres y süa proveniënza originala tla liënda: le re de Fanes rajona mareo, la regina de Fanes y Dolasila/Lujanta badiot, Ey de Net, le prinz di Cajutés y i comandënc dles popolaziuns vijines de Fanes fascian, Spina de Mul y la Tsicuta gherdëina.
Ince la musiga dl film é gnüda realisada te mainira particolara: al é gnü tut ite musicontri dles valades Badia -dantadöt fora dla müjiga de Badia cun le diretur Friedl Pescoller co-responsabl dla strumentaziun- y Gherdëina. Porater él gnü adoré chës sortes de strumënc che alda pro les plü primitives -percusciuns y strumënć a fle- y che vëgn dant tla tradiziun musicala dles valades ladines. La usc (Susy Rottonara, sopran), se presënta sciöche n comentar intern sön avenimënc y sentimënc da pert dla figöra plütosc complicada de Dolasila / Lujanta.
GALLERY
DVD por ladin cun sottitui por talia y por todësch
Musiga originala dl film Le Rëgn de Fanes
CD
DOWNLOAD ALBUM